Ano ang iyong masasabi sa iyong guro?

“Ang Guro Naming Istrikta”

“Oi! Nandiyan na si Maam, ayos na!”

Ayos ng mga upuan, ayos ng sarili, tago ng mga gamit sa ibabaw ng lamesa at Voila! Balik na sa normal ang lahat na parang walang nangyari.

Ganito ang sistema namin araw-araw. Tuwing naririnig namin ang yabag ng aming guro ay dali-dali kaming babalik sa aming mga normal na pwesto at mananahimik. Takot at minsang kinakabahan kami sa kanya. Ito ay dahil sa sobra niyang istrikta at minsan ay masama ang “awra”. Kapag nagbigay siya ng takdang-aralin o proyekto ay agad din naming gagawin. Kapag may Pangkatang Gawain naman ay sinisigurado naming may mga gawa kami. Sa kanyang klase ay sobrang nakikinig kami at nakikisali sa diskusyon.  Lahat din ay nakaka “relate” sa kanyang mga tinuturo kaya’t labis naming gusto ang kanyang paraan ng pagtuturo.

Sobra siyang istrikta sa aming pananalita. Ipinagbabawal niya ang pagsasalita ng anumang “English Word” sa kanyang klase. Mahigpit din siya pagdating sa pagbibigay ng petsa sa pasahan ng mga proyekto. Kailangang makapasa ka sa takdang-oras na ibinigay niya, dahil, kung hindi ay hindi na niya ito tatanggapin.

Pero, sa likod ng kanyang pagiging istrikta ay ang kanyang pagiging masayahin, mapagbiro at magandang guro. Nakikisakay siya sa mga “trip” namin sa klase at patawang ginagawa sa mga presentasyon. Nagbibiro rin siya sa aming klase at sa ilan kong kamag-aral at nagbibitaw ng kung anu-anong “jokes”. At ang isang bagay na nagustuhan ko sa kanya ay ang poagbibigay payo niya sa akin tungkol sa Pag-ibig. Diba po Ma’am? #Destiny! Hahaha! Pero, seryoso magaling talaga siyang magbigay payo sa kanyang mga estyudyante.

Napakaswerte nga namin kung tutuusin, dahil sa siya ang naging guro namin sa Filipino at ina sa Umalohokan. Maraming aral at payo kaming natutunan mula sa kanya. Hindi rin siya tulad ng ibang guro na hindi marunong ngumiti. Masaya akong naging guro ko siya dahil hindi naging “boring” ang taon ko kasama siya. Kaya’t Maraming Salamat Po Gng. Marvilyn Mixto! Hanggang sa susunod pang pagsasama! Mabuhay! J

Ano ang iyong masasabi sa K-12 Kurikulum?

“Maganda nga ang hangarin, ngunit marami ang kakulangan”

     Mapaganda at maayos ang uri at sistema ng edukasyon sa ating bansa, ito ang layunin ng bagong kurikulum na ipinapatupad sa loob ng bansa, ang K-12 O Kinder to Grade 12. Sa loob ng kurikulum na ito, ay dinadagan ng dalawang taon pa sa Hayskul ang pag-aaral ng isang estudyante. Ang dating apat na taon ay naging anim na taon. Ang karagdagang dalawang taon na ito ay tinawag na “Senior High School”.

            Sa loob ng 2 taon, matutunan ng mga mag-aaral ang iba’t-ibang kursong nais nilang kunin sa Kolehiyo.  Para naman sa mga mag-aaral na wala pa sa Senior High School pero nasa ilalim ng K-12 ay matututo ng iba pang mga bagay na wala sa dating kurikulum. Ang paraan din ng pagbibigay grado ay naiba na. Ito na ngayon ay nahati sa apat: Knowledge, Process, Understanding at Product. Maganda man ang hangarin ng programa ay hindi pa rin naman maitatago ang katotohanang marami pang pagkukulang sa bawat paaralan sa pagpapatupad nito. Hindi pa tayo handa para rito.

            Una, ay ang kakulangan sa mga silid-aralan. Dahil dadami na nang dadami ang mga mag-aaral na papasok sa eskwela ay kailangan na rin ng marami at sapat na mga silid-aralan para sa kanila. Ngunit, sa napapansin natin ay mabagal pa rin ang pagkilos ng paaralan sa problemang ito.

            Pangalawa, ay ang kakulangan sa mga magagaling na guro. Dahil sa mababa at di sapat na sahod ng mga guro dito sa Pilipinas ay humahanap sila ng trabaho sa ibang bansa, kaya’t nagkakaroon tayo ng mga kulang na guro rito.

            Isa pa sa mga problemang may kaugnayan sa K-12 ay ang kakulangan ng kagamitan ng guro at kagamitan din ng paaralan. Dahil sa mga kulang na kagamitang ito ay maaaring mapabagal ang proseso ng karunungan ng mga mag-aaral at maaaring hindi rin nila maintindihan ang kanilang mga aralin.

            Alam nating lahat na napakaganda ng layunin ng K-12. Ngunit, hindi naman sapat ang anumang meron tayo ngayon sa pagpapatupad nito. Siguro ay mas mabuting gumawa muna ng solusyon ang pamahalaan sa mga problemang ito bago gumawa ng hakbang. Mas mabuting gumawa ng isang programa kung walang problema, dahil mas maganda ang magiging resulta.  

    

Buong Karanasan sa Baitang 9

  

Karanasang Hindi Malilimutan”

       

Masaya, malungkot, nakakabaliw at kakaiba. Halu-halongn emosyon ang aking naranasan o naramdaman sa loob ng 10 Buwan, kasama ang aking mga kamag-aral, kaibigan at guro. Mga taong nagbigay kulay at naging dahilan ng aking pagpasok araw-araw. Sila ang naging katuwang ko sa lahat ng problemang dumating sa akin sa paaralan.

Masaya, dahil nakakilala ako ng mas maraming tao bukod sa aking mga kamag-aral at naging malapit ako sa iba’t-ibang baiting lalung-lalo na sa ikaapat na taon. Marami rin akong natutunang bagong bagay mula sa mga gurong bago rin sa aking paningin. Naging kahanga-hanga ang mga gurong nakasama at nagturo sa amin sa taong ito. Masaya rin ako dahil dito lalong napatibay ang pagsasama namin ng Antimony o ng “AntiPulo”.

Malungkot? Dahil ba sa taong ito ako umasa at nasaktan? H-I-N-D-I kaya! Wala itong kinalaman sa pag-ibig. Malungkot, dahil sa nagkaroon kami ng mga di-pagkakaunawaan ng aking mga kamag-aral. Dito muling nasubok ang aming samahan. Pero, ika nga nila, “Pagkatapos ng ulan ay isang bahaghari”. Matapos ang malabagyong pag-aaway ay isang makulay na bahaghari ang nagging katapusan nito. Marami rin kaming natutunan sa mga hindi pagkakaintindihang naranasan na aming magiging gabay sa susunod pang mga taon.

Nakakabaliw. Nakakabaliw, dahil sa mga sunod-sunod na takdang-aralin, proyekto at kung anu-ano pang “paper works”. Yung tipong puro maiikling pelikula ang aming produkto sa apat na asignatura?! Nakakabaliw talaga! Hindi namin alam kung ano ang uunahing gawin, kung saan magsho-shoot at kung paano hahatiin ang aming oras. Pero, dahil sa kooperasyon at pag-iintindi sa isa’t- isa ay naging matagumpay ang aming mga Gawain. Sa katunayan, ay natatawa na lang kami tuwing naaalala ang aming mga mukha tuwing natataranta at nababaliw sa aming mga proyekto. Naging daan din ito upang maging mas malapit kami sa isa’t isa. At sigurado kaming mami-miss namin ito pagkatapos ng klase.   

Kakaiba. Kakaiba dahil sa taong ito ako nakaranas ng mga kakaibang karanasang bago sa paningin ko at ng ibang tao. Unang-una, ay sa taong ito ko naranasang sumali sa mga organisasyong hindi ko nasalihan noong nakaraang taon, partikular na sa GSP at Umalohokan. Sa Girl’s Scout ko naranasang sumali sa mga “Camping” at “Badge Fairs”. Habang sa Umalohokan ko naman naranasang ipanlaban sa ibang paaralan sa Antipolo. Unang beses kong naging kinatawan ng Mambugan kasama ang iba pang manunulat. At unang beses ko ring naranasang manalo rito at makatungtong ng Regional na nagdala sa akin sa Lipa, Batangas. Dito ako nakakilala ng iba’t-ibang tao mula sa Antipolo at maging sa CALABARZON. Ang mga karanasang ito ang naging dahilan ng pagiging di-ordinaryo at di-malilimutang taon ko sa Baitang 9.

Ang pagiging “Grade 9 Student” ang magiging isa sa mga di-malilimutang karanasan ko sa Hayskul. Kaya, Salamat sa mga taong naging bahagi ng buhay ko sa Baitang 9 at naging dahilan ng pagiging mas matatag ko sa susunod pang mga taon. Salamat sa mga aral at paying ibinahagi nyo sa akin. Hindi man naging madali ang taong ito para sa akin, naging masaya at sulit naman ito dahil sa inyo.  Salamat sa 10 buwan kasama kayo at sa mga ala-alang nabuo. Maraming Salamat Baitang 9!      

Takdang Aralin: Ipaglalaban Kita, Dahil Mahal Kita

Ang aming Takdang Aralin na may kaugnayan sa "Kalakasan ni Maria Clara". Ito ay isang Maikling Kwentong pinamagatang "Ipaglalaban Kita, Dahil Mahal Kita" <3

Pangkatang Gawain (Pangkat 3) : )

Ang aming natapos na gawaing may kaugnayan sa Paggawa ng Tula tungkol sa "Tunay na Pag-ibig" :) .

Ikasiyam na Linggo

Marso 10-14, 2015:

           Magandang Buhay!

Maraming nangyari sa klase namin sa linggong ito. Una, noong Lunes (Marso 9) at Martes (Marso 10) ay ang aming “Prelims”. Ito ay isinagawa sa lahat ng unang pangkat sa iba’t-ibang baitang at taon. Kinabukasan, ay ang pagsasagawa namin ng correct response. Binalikan din namin ang mga pangyayari sa buhay ni Maria Clara at Sisa at sinagot ang mga tanong na may kinalaman sa kanila. Nagbigay din ng Pangkatang Gawain ang aming guro na may kaugnayang  muli sa buhay ni Maria Clara. Ito ay may kinalaman sa kanya bilang tao, mangingibig at sa mga desisyong ginawa niya sa nobela. Bawat grupo ay may kahanga-hangang presentasyon. Ang aming pangkat ay nagsagawa ng isang debate samantalang dula-dulaan naman ang sa ibang grupo. Nang sumunod na araw ay nagkaroong muli kami ng Pangkatang Gawain na may kaugnayan naman sa “Tunay na Pag-ibig”. Bawat grupo ay naatasang iulat ito sa iba’t-ibang paraan. Mayroong sa pamamagitan ng poster, awit, tula, at islogan. Naging katuwa-tuwa rin ang produkto ng bawat pangkat. Dahil dito ay naatasan kaming kunan ng litrato ang aming presentasyon at i-post sa kanya-kanyang blog. Nagkaroon din kami ng takdang aralin para sa linggong ito. Ito ay ang paggawa ng isang maikling kwento tungkol sa kalakasan ni Maria Clara. Isusulat namin ito sa bondpaper, kukunan ng litrato at ipopost sa blog hanggang linggong ng gabi.

Ito ang mga ginawa namin  sa linggong ito. Maraming Salamat! Hanggang sa muli !

   

Ikawalong Linggo

  Marso 3-6 2015:

      Magandang Buhay! ;)
      Ngayong linggo ay tatlong araw muli ang aming klase sa Filipino. Ito ay dahil sa nawalan ng pasok ang lahat ng baitang pwera ang ikaapat na taon dahil sa National Achievement Test (NAT).
      Sa aming tatlong araw na klase ay tinalakay namin ang buhay ng iba pang tauhan sa Noli Me Tangere bukod kay Crisostomo Ibarra, partikular na kina Elias, Maria Clara at Sisa. Binigyan kami ng Takdang Aralin ng aming guro noong nakaraang linggo na tungkol sa Mga Kabanata ni Elias sa Nobela, pinasa at inisa-isa namin itong tinalakay at pinag-aralan noong unang araw. Natapos naming talakayain ang buhay ni Elias sa loob ng isang araw kaya't nagtungo na kami sa buhay nila Sisa at Maria Clara. Binigyan muli kami ng aming guro ng takdang -aralin kung saan ay kinakailangan naman naming alamin ang mga kabanata nina Sisa at Maria Clara sa nobela upang maging paunang kaalaman. Natapos rin naman agad namin ang araling ito. Sa pag-aaral ng buhay ng mga tao, dito  ko nalaman na may mahalagang gampanin din pala sila sa naging buhay ni Ibarra sa nobela. Hindi lang pala sila nilagay doon ng may-akda para maging "palabok" at "pamulak-lakin" ang nobela kundi para na rin maghatid ng iba't ibang aral.
      Upang malaman na may natutunan kami sa mga nakalipas na aralin ay binigyan kami ng tanong ng aming guro na dapat sagutin.  Ito ay may kinalaman sa buhay ni Maria Clara at Sisa na amin ding naging takdang aralin! :)

Ikapitong Linggo

Pebrero 24-27:

     Tatlong araw lang sa linggong ito ang klase namin sa Filipino. Itp ay dahil sa walang pasok noong Miyerkules (Peb 25) sapagkat "People Power Revolution Anniversary". Pero, dalawa sa tatlong arawa na ito ay wala kami dahil sa pangangampanya sa "SSG Election 2015".
     Nabasa ko sa blog ng aking kaklase na si Ate Camille Vivar na ipinagpatuloy nila ang pagsagot sa katanungang "Biktima nga ba ng pagkakatao si Crisostomo Ibarra?". Para sa akin ay biktima lang sya ng pagkakataon. Dahil nagkataon lang na anak siya ng taong kinagagalitan at kinaiingitan ni Padre Damaso na si Don Rafael. Ito ang dahilan kung bakit labis na hirap at pasakit ang dala sa kanya ng kura. Ngunit, kung hindi sya anak ni Don Rafael ay hindi naman sya sasaktan at papahirap nito. Nalaman ko rin sa kanyang blog na nagkaroon sila ng "Mock Trial" kung saan ay kinakailangan nilang litisin si Ibarra at Elias. Ito ay umikot sa paksang tama ba ang ginawang pagtakas ni Ibarra at Elias gayong may mga bagay pa silang dapat harapin. Balita ko'y naging maganda at nakakaaliw ang naging resulta nito. Nagkaroon din kami ng katamtamang pagsusulit aa linggong ito. Dito ay sinubok muli kami ni Gng. Mixto kung may natutunan talaga kami sa ilang linggong pag-uulat sa buhay ni Ibarra. Sinulat namin dito ang lahat ng tungkol sa buhay pag-ibig at hangarin ni Ibarra. Ito lang ang mga bagay na ginawa namin sa linggong ito. Sa susunod na mga araw ay buhay naman ni Elias ang ang tatalakayin at kaugnayan nito ay nagkaroon kami ng takdang aralin. ! :) ?

Ikaanim na Linggo

     Pebrero 17-20:

            Pag-uulat, ito muli ang ginawa namin sa loob ng linggong ito. Matapos ang pag-uulat noong nakaraang linggo ay sinariwa namin ang mga kabanatang inulat ng iba't ibang pangkat. Upang mas lalong malaman ng aming guro na natututo kami sa pag-uulat ng bawat isa ay binigyan nya kami ng Pangkatang Gawain. Ito ay ang pagkakaroon ng isang "may pasabog" na presentasyon tungkol kay Crisostomo Ibarra. Iba't ibang paksa ang naiatas sa bawat grupo. Sa amin ay ang buhay pag-ibig ni Crisostomo Ibarra, sa ibang grupo ay tungkol sa banta sa buhay niya, hangarin nya at kung anu-ano pa.? Buong akala namin na kinabukasan na ito iuulat ngunit nagkamali kami. Noong araw ring iyon ay pinapunta kami ng aming guro sa kanya kanya naming grupo upang pagplanuhan ito. Pero, dahil ubos na rin ang aming oras ay kinabukasan na nga sa amin iyon pinaulat.
        Dahil nga sa laging ang Pangkat 1 ang nauuna sa pag-uulat ay inuna naman ng aming guro na pag-ulatin ang Pangkat 4, 3, 2, at 1. Pangkat 4 at 3 lang ang natapos mag-ulat noong Miyerkules kaya Biyernes na itinuloy ang pag-uulat ng dalawa pang pangkat dahil sa walang pasok kinabukasan dahil "Chinese New Year".
        Nag-ulat na nga ang Pangkat 2 at 1. Mabilis lang ang kanilang naging pag-uulat kaya't nagkaroon pa kami ng pagkakataong balikan muli ang mga kabanatang aming natapos nang talakayin. Sa katunayan ay natapos na namin ang 29 na kabanata ni Crisostomo Ibarra sa nobela kaya't inaasahan naming ang iba namang tauhan sa nobela ang aming sunod na tatalakayin. Kaugnay nito ay nagkaroon kami ng takdang aralin. Ito ay ang pagguhit ng isang bagay na sumisimbolo sa isang taong malapit at malaki ang kaugnayan kay Ibarra. Ipapasa namin ito aa Martes.
   Ito ang mga ginawa namin sa linggong ito. Yan lamang po at Maraming Salamat! ;)

Ikalimang Linggo

   Pebrero 10-13:

          Pag-uulat, ito ang ginawa namin sa buong linggong ito. Inulat ng bawat miyembro ng apat na pangkat ang bawat kabanatang naiatas sa kanila. Pitong kabanata kada grupo ang dapat na maiulat. Ang 28 na kabanatang dapat naming iulat ay ang mga kabanata ni Crisostomo Ibarra sa Noli Me Tangere.
         Unang nag-ulat sa linggong ito ay ang Pangkat 2. Dahil ang pangkat 1 ay natapos na noong nakaraang biyernes. Bago mag-ulat ang pangkat 2 ay binigyan muna kami ng aming guro ng isang pagsasanay. Sa pagsasanay na ito ay kinakailangan naming isulat ang mga "Mahahalagang Pangyayari sa Tauhang si Crisostomo Ibarra" at "Dahilan kung bakit ito mahalaga". Ang pagsasagot nito ay dapat bawat kabanatang naiulat na ng unang pangkat. Ngunit, dahil alam na ng aming guro na hindi namin ito matatapos kaya't ginawa nya na lang itong takdang aralin. Ang mga kabanatang naiulat na ng dalawang pangkat ang aming bibigyan ng kasagutan.
       Matapos mag-ulat ng Pangkat 2 ay binigay na ng aming guro ang mga kabanatang iuulat ng Pangkat 3. Natapos nang mag-ulat ang Pangkat 3. Nang sumunod na araw ay nag-ulat na rin ang Pangkat 4 ngunit, sa pagkakataong ito ay hindi lang ang Antimony ang nakasaksi sa kanilang pag-uulat ngunit pati na rin ang Hydrogen.
      Nang sumunod na araw (Biyernes) ay isinantabi muna namin ang pag-aaral sa Noli Me Tangere, ito ay dahil sa gagawa kami ng isang "card" para sa isang selebrasyon ang Araw ng mga Puso. Ngunit, sa pagkakataong ito ay isang tula ang nilalaman ng card. Maaari itong ialay sa isang tao o di kaya'y tungkol lang sa pagmamahal. Ipinasa namin ang aming gawa kay Jenica at sya na lamang ang magbibigay nito sa aming guro.
       Yan ang mga bagay na ginawa namin sa linggong ito. Maraming Salamat. :'
    

Ikaapat na Linggo

  Pebrero 3-6:

      Unang araw sa linggo ito ay nagkaroon kami ng "Parade of Characters". Dito ay pinakilala namin ang mga tauhan sa Noli Me Tangere sa pamamagitan ng paggaya sa kanilang mga kasuotan. Sinabi rin namin ang mga sikat na linya na binitawan ng mga karakter sa nobela at papel na kanilang ginampanan dito. Natuwa naman ang aming guro sa aming naging produkto. Lalo na sa mga kamag-aral kong binigay lahat ng kanilang makakaya at isinabuhay ang pang-gagaya. Natapos ang aming unang produkto nang Matagumpay! :)
     
      Pagkatapos nito ay ipinagpatuloy namin ang aming talakayan sa mga tauhan sa nasabing nobela, partikular na kay Crisostomo Ibarra.  Inisa-isa namin ang mabubuti at masasamang ugali ni Ibarra. At kaugnay din ng pagtalakay sa mga tauhan ay nagkaroon muli kami ng  produkto. Ito ay ang paggawa ng isang liham para sa isang kaibigan. Babatiin at pupurihin mo ang iyong kaibigan sa liham, dahil sya ay bibigyang parangal ng isang istasyon sa telebisyon. Ang mapupuntahan ng liham ay ang istasyong magbibigay parangal sa kanya. Marami ang nagkamali sa nasabing liham dahil kaibigan ang kanilang sinulatan. Dahil dito ay pinaulit ng aming guro ang produktong ito sa mga nagkamali at pinapasa sa mismong araw ding iyo.
   
    Kaugnay pa rin ng pagtalakay namin sa Noli Me Tangere ay ang pagkakaroon ng pangkatang pag-uulat. Bawat grupo ay inaasahang   iuulat ang 7 kabanatang naatas sa kanila. Ang mga kabanatang ito ay hahatiin sa mga myembro ng bawat pangkat. Natapos nang mag-ulat ang unang pagkat, ang ikalawang pangkat na ang mag-uulat sa Martes.

   Yan ang mga bagay na aming ginawa sa linggong ito. Maraming Salamat! :')