Ikatlong Linggo ng Ikaapat na Markahan

   Enero 29-30:

             Dalawang araw sa linggong ito (27-28) ay wala kami pati na rin si Gng. Mixto dahil sa RSPC. Kaya ang natitirang dalawang araw nalang ang aking bibigyan ng repleksyon.
             Sa loob ng dalawang araw ay pinag-aralan namin ang tungkol sa mga tauhan ng Noli Me Tangere.Dahil na rin sa ito ay ibinatay sa tunay na karanasan ni Rizal, binigay namin ang mga taong sinisimbolo ng bawat tauhan sa nobela:
•Maria Clara- Leonor Rivera
•Crisostomo Ibarra- Jose Rizal
•Pilosopong Tasyo-Pasiano Rizal
•Padre Damaso-Padre Antonio Piernavieja
•Kapitan Tiyago- Kapitan Hilario Sunico
•Donya Victorina -Donya Agustina Medel de Coca
•Crispin at Basilio- Magkapatid na Crisostomo
•Prayle- Mga Paring Pransiskano
    Pagkatapos aralin ang mga ito ay pinaliwanag at kinilala namin sila isa-isa, sa pamamagitan ng pagbabasa ng mga kabanata sa nobelang tumutukoy sa kanila. At dahil sa hindi pa namin sila lubusang kilala ay binigyan kami ng takdang aralin ng aming guro kung saan ay kinakailangan naming makilala ang ito at ang pagbabasahing muli ng kanilang kabanata sa nobela, partikular na ang mga kabanata ni Crisostomo Ibarra 

Ikalawang Linggo ng Ikaapat na Markahan

   

Enero 20-23:

 Sa linggong ito ay tinalakay namin ang Kaligirang Pangkasaysayan ng Noli Me Tangere. Dito ay nalaman namin ang mga bagay na  nagtulak kay Rizal nang pagsulat nya ng nasabing nobela. At ito ay ang “Pagkalugi ng Galleon Trade”, “Pagkakaroon ng di matatag na pamahalaan” at ang “Paglaya ng iba pang kolonya ng Espanya”.  Kaugnay ng araling ito ay nagkaroon kami ng Pangkatang Gawain.  Ang bawat pangkat ay inaasahang ipaliwanag ang kaugnayan ng mga nasabing kaganapan sa pagsusulat ni Rizal ng Noli. Binigyan kami ng aming guro ng isang babasahin na makakatulong sa amin sa pagsagot ng aming Gawain.

Pinag-aralan din namin ang tungkol sa Liberalismo (Kalayaan), Equalidad (Pagkapantay-pantay) at Praternidad (Kapatiran). Dito ko natutunan na ang mga ito ay nakatulong at naging daan din sa pagkakalimbag ng Noli at pagkamit natin ng ating kalayaan.

Wala kami nina Jennica, James at Ate Camille noong ika -22 hanggang 23 ng Enero dahil sa “Division Cliniquing” para sa darating na “RSPC 2015” sa Lipa. Kaya’t hindi namin alam ang mga nangyari sa loob ng mga araw na ito. Pero, nabasa ko sa blog ng aking kamag-aral na si Ronaline (http://ronalineoliveros.blogspot.com/2015/01/ikalawang-linggo.html#comment-form) na sila ay nagkaroon ng Pangkatang Gawain na may kaugnayan sa mga akda ni Rizal, partikular na  sa “Sa aking mga Kababata” ,“Ang Tsinelas” at  “Ang Gamu-Gamo  at si Jose Rizal”. Sila rin daw ay nagkaroon ng isang debate patungkol sa tanong na: Dapat ba o di-dapat ginamit ni Rizal ang kanyang panulat sa kapakanan ng Bayan. At lahat daw di-umano ay nahirapan sa pagsagot ng katanugang ito.

           

Unang Linggo ng Ikaapat na Markahan! :)

    Enero 14-16, 2015:

           Ngayong Linggo ay ang unang linggo ng Ikaapat na Markahan. Dahil sa katatapos lang ng aming Ikatlong Markahang Pagsusulit ay nag-check at "correct response" lang kami aa unang araw. Matapos malaman ang aming iskor at kung pasado ba kami o hindi ay binigay na ni Gng. Mixto ang pasilip sa Noli Me Tangere na aming tatalakayin sa markahang ito. Binigay nya na rin sa amin ang aming magiging produkto. Ito ay ang Trailer at Short Film na tungkol sa ilang kabanata ng nasabing nobela o sa ilang taong nagbigay buhay dito. Ngunit, sa sumunod na araw ay wala si Gng. Mixto dahil sa ilang importanteng bagay na dpat asikasuhin. Dahil dito, si G. Mixto ang kanyang naging katuwang. Kami ay nagkaroon lamang ng Pantayang Pagsusulit para sa Markahang ito upang malaman kung gaano ba namin kaalam ang Noli Me Tangere. Matapos ang Pantayang Pagsusulit ay binigyan kami Ni G. Mixto ng isang takdang aralin. Ito ay ang pagkakaroon ng kopya ng Kaligirang Pangkasaysayan ng Noli Me Tangere at ang buod nito.
   Ito ang mga bagay na aming ginawa sa unang linggo ng ikaapat na markahan. :D

Ang Aking Bakasyon! :)

 
   Disyembre 19, 2014 - Enero 4, 2015:
 
           Dahil malapit na ang Pasko at Bagong Taon, kami ay nagkaroon ng bakasyon upang makapagpahinga at makasama na rin ang aming pamilya.
           Sa aming dalawang linggong bakasyon, ito ang mga bagay na aking ginawa at mga lugar na napuntahan.
           Ika-20 ng Disyembre, pumunta kami sa Cubao dahil sa "Christmas Party" ng aking Papa. Dito ay nagkaroon kami ng kaunting salu-salo at nagsaya kasama ang pamilya ng iba pang ka-trabaho niya.
          Ika-16 hanggang 24 ng Disyembre, ito ay ang siyam na araw ng Simbang Gabi, kaya't  kami ay nagsimba kasama ang aking pamilya at kung minsan ay ang aking mga kaibigan o kaklase. Hindi man namin nakumpleto ang 9 na madaling araw na iyon, kami naman ay naging masaya sa ilang araw na magkakasama at sa tuwang makita ang bawat isa kahit bakasyon pa.
         Ika-24 ng Disyembre, Noche Buena na mamaya pero, wala pa rin kaming ihahanda kaya't namalengke muna kami ni Mama. Umuulan ng araw na iyon kaya't nakakainit ng ulo sabayan pa ng napakaraming tao. Binilisan na lang namin ang pamamalengke at natapos rin. Hapon na ng magsimula kaming magluto at naghanda na rin para sa "Christmas Party" sa aming lugar. Pagkatapos ng party ay umuwi na rin kami at dito ay sabay- sabay kaming kumain at nagsalu-salo sa aming munting handa.Pero ang sayang dulot ng sama  sama naming pagkain ay umaapaw at sobra-sobra.
         Ika-25 ng Disyembre, Pasko na! Bilang selebrasyon, ako ay nanood ng sine kasama ang aking mga kaibigan. Feng Shui ang aming pinanood. Tuwa at takot ang dulot sa amin ng pelikulang iyon. Naglibot din kami sa Sta. Lucia at gabi na umuwi nang sobrang saya.
         Ika-27 ng Disyembre, pumunta kami ng Bulacan para sa "Babang Luksa" ng aking lolo. Nagsimba kami sa Simbahan ng Barasoain at dumiretso sa sementeryo. Pagkatapos ay nagkaroon kami ng "bonding" magpipinsan at namangka pa.
        Ika-31 ng Disyembre, Mega Noche na mamaya kaya't abala kaming lahat sa pagluluto. Gabi na nga ng matapos kami sa paghahanda. Pagsapit ng 12:00 ng madaling araw ay nagpaingay na kami ng torotot. Kumain kami ng Mega Noche ng kumpleto at sobrang saya. Natulog kami ng 2:00 ng madaling araw ng may mga ngiti sa labi.
       Kulang pa kung tutuusin ang dalawang linggong bakasyon. Kulang pa ang panahong ito upang makasama ang aming pamilya at magkaroon ng oras para sa kanila. Pero, ang dalawang linggong ito ay nagdulot ng sobrang kasiyahan sa akin at sa mga taong aking nakasama sa maikling panahon na ito. :)
           

Ikawalong Linggo (Sanaysay at Pamaksang Pangungusap)

Enero 6-9, 2015

          Sa unang araw ng linggong ito ay pinag-aralan naming ang “Sanaysay”. Ito ay isang uri ng panitikan na naglalaman ng opinyon at kuro-kuro ng may-akda. Katulad ito ng “Editoryal o Pangulong Tudling” ng isang pahayagan. Ito ay may tatlong elemento: Paksa, Tono at Kaisipan. Ang paksa ay ang binibigyang opinyon ng manunulat. Ang tono naman ay ang nararamdaman ng may akda habang sinusulat ang salaysay. Habang ang kaisipan ay ang mensaheng gustong iparating ng manunulat sa pagsulat nya ng salaysay o sanaysay.

          Sa kalagitnaan naman ng linggong ito ay tinalakay namin ang “Pamaksang Pangungusap”. Ito ay ang pangunahing ideya o pinapaksa sa isang talata. At sa tulong ng “Pantulong na Pangungusap” ay nabibigyang suporta nya ang pantulong na pangungusap. Ito ang nagpapaliwanag ng lahat ng mga bagay at ideyang nakapaloob sa Pamaksang Pangungusap.

          At sa huling bahagi naman ng aming unang lingo para sa taong 2015, ay nagkaroon kami ng konting pasilip tungkol sa “Synopsis” at “Pangangatwiran”. Kami rin ay nagkaroon ng “Summative Test” para sa markahang ito. 

Ikapitong Linggo: (Pagpapasidhi ng Damdamin at Pagbabalik Aral)

   Disyembre 16-17:

        Ngayong Linggo ay wala si Gng. Mixto kaya't si Bb. Basbas ang humalili sa kanya. At dahil nga dito, kami ay nag-aral lang ng isang aralin at nagbalik aral sa mga nakaraang pag-aaral.
       Binasang muli namin ang akdang "Kung tuyo na ang luha mo aking bayan" ni Amado V. Hernandez, at dito ay nalaman naming mali ang aming kopya. Binasa ni Bb. Basbas ang tamang kopya at nakinig na lamang kami. Pagkatapos magbasa ay inintindi namin ito at sinagot ang mga katanungan ukol dito. Binalikan din namin ang aralin tungkol sa Elehiya, Dalit at Oda/Himno.
        Sa sumunod na araw ay pinag-aralan namin ang Pagpapasidhi ng Damdamin. Sya rin ay nagbigay ng mga pagsasanay na may kinalaman dito. Kami ay pinagawa rin nya ng isang Elehiya tungkol sa pagkamatay kunwari ng aming kaibigang sundalo. Ito ay aming isinulat sa makulay na papel at binubuo ng tatlong saknong na may apat na taludtod at malaya.
        Ang mga ito ay ang mga bagay na aming ginawa ilang araw bago ang ilang linggong bakasyon.

Ikaanim na Linggo: Elehiya, Dalit at Oda

Disyembre 9-12:

           Tatlong araw sa linggong ito ay wala si Gng. Mixto, kaya’t ang kanyang asawa na si G. Mixto ang nagturo sa amin.  Kami ay nagkaroon ng 4 na gawain. Ang una ay ang pag-unawa sa aming binasang akda na "Elehiya sa Kamatayn ni Kuya" sa pamamagitan ng pagsagot sa mga katanungan. Ikalawa ay ang pagbabasa sa "Ang mga Dalit Kay Maria" at pagsagot din sa mga katanungan ukol dito. Ang ikatlo naman ay ang paghahambing sa dalawang akda gamit ang iba’t-ibang element tulad ng Tema, Layon ng may-akda, Antong tula, Damdaming Naghahari, Kaugalian at Wikang Ginamit, na amin ding magsisilbing takdang-aralin. At ang pang-apat ay ang pagbabasa at pag-unawa rin sa tulang "Kung tuyo na ang luha mo aking Bayan" ni Amado V. Hernandez at ang pagsagot din sa mga katanungan na may kinalaman ditto. Sa pagbalik naman ni Gng. Mixto sa huling araw ng linggong ito ay nagkaroon kami ng talakayan. Ito ay ukol sa Elehiya, Dalit at Oda. Ang “ELEHIYA” ay isang tulang liriko na tungkol sa kamatayan ng isang mahal sa buhay at pagsasariwa sa kanyang mga alaala. Samantalang, ang “DALIT” ay tulang awit din na binubuo ng walong pantig bawat taludtod, apat na taludtod bawat saknong at may isang tugmaan. Ito rin ay pumupuri at nagtatangi sa Dyos at sa Birhen. Habang ang “ODA”  ay isang uri rin ng tulang liriko na nilampatan ng tono na pumupuri at pumaparangal sa dakilang gawain o tao. At dito nagtatapos ang aming panibagong linggo sa pagtalakay sa “Panitikang Pilipino at Asyano”.